ఇంట్లో మెుక్కలు పెంచుకుంటే మనసు ప్రశాంతంగా ఉంటుంది. వీటిలో అలంకరణ కోసమే కాకుండా ఆరోగ్యం కోసం కూడా పెంచే మొక్కలు ఉన్నాయి. ఇండోర్ లో పెంచే మొక్కలు చెడు గాలిని శుభ్రం చేస్తాయి. తాజా ఆక్సిజన్‌ను అందించడమే కాదు మనసుకు ఆహ్లాదాన్ని పంచుతాయి. మొక్కలకు నీళ్లు పట్టడం, పొడవు పెరిగిన మొక్కల భాగాలను కత్తిరించడం వంటి పనులు మిమ్మల్ని ఎంతో ప్రశాంతంగా ఉంచుతాయి.
ఇంట్లో మొక్కలను పెంచుకోవటం వల్ల అందంతో పాటు, వాతావరణాన్ని ఆహ్లాదంగా ఉంచుతాయి. ఇండోర్ లో పెంచే మొక్కలకు నేరుగా సూర్యరశ్మి పెద్దగా అవసరం ఉండదు. అలాగే వాటి గురించి ప్రతి రోజూ శ్రద్ద తీసుకోవాల్సిన అవసరం కూడా ఉండదు. అయితే చూసేందుకు మాత్రం ఆ మొక్కలు ఎంతో అందంగా ఉంటాయి. ఇండోర్ ప్లాంట్స్ ఆరోగ్యానికి మేలు చేస్తాయని చాలా పరిశోధనలు చెబుతున్నాయి.
ఇండోర్ ప్లాంట్స్ వల్ల ఇంటి వాతావరణం పొడిగా, వేడిగా అనిపించకుండా ఆహ్లాదంగా మారుతుంది. గదుల్లో సైతం మనీ ప్లాంటేషన్‌ వంటి మొక్కలను పెంచితే వేడిని చాలా వరకు తగ్గిస్తాయి. ఇంట్లో గుబురు మొక్కలు ఏర్పాటు చేసుకుంటే కలిగే ప్రయోజనాలు ఎన్నో ఉంటాయి. స్వచ్ఛమైన గాలిని అందించడంలో వీటిదే కీలక పాత్ర అని చెప్పుకోవచ్చు. గుబురు మొక్కలు గాలిలోని కాలుష్యాన్ని తొలగిస్తాయి. అలాంటి మొక్కల్లో ఆలోవెరా ఒకటి. ఇది ఎక్కడైనా సులభంగా పెరుగుతుంది. ఇంట్లో ఈ మొక్క ఉండటం వలన దోమలను సులభంగా వదిలించుకోవచ్చు.
ఇండోర్ ప్లాంట్స్ వల్ల కలిగే ఆరోగ్యప్రయోజనాలు ఏంటి ?
ఇండోర్ ప్లాంట్స్ ఇంటి అందాన్ని మరింత పెంచడంతో పాటు ఇంట్లోని గాలి నాణ్యతను మెరుగుపరుస్తాయి. వీటికి గాలిలోని కాలుష్యాన్ని తొలగించే సామర్థ్యం ఉంటుంది. అలాగే ఇంటికి మంచి లుక్ కూడా వస్తుంది. అలాగే చైనీస్ ఎవర్ గ్రీన్ మొక్క చాలా రకాల గృహ కాలుష్యాలను నివారించడంలో అమోఘంగా పనిచ్స్తుంది. గాలిలోని పలు రకాల హానికారక రసాయనాలను తొలగిస్తుంది. తక్కువ వెలుగులో సైతం బతికేస్తుంది. అరెకా పామ్ దీని నిర్వహణ చాలా సులభం. నీరు పోస్తే దానంతట అదే పెరుగుతుంది. ఫార్మల్ డీహైడ్, బెంజీన్ సహా భవనాల్లోపల ఉన్న గాలి కాలుష్యాలను ఇది సమర్థవంతంగా ఫిల్టర్ చేస్తుంది. గాలిలోకి తగినంత తేమను విడుదల చేస్తుంది. సూర్యుని వెలుతురు కొద్దిగా లభించే చోట దీన్ని ఉంచుకోవాలి.
ఇంట్లో పెంచుకునే ఆరోగ్యాన్ని అందించే మొక్కల్లో పుదీనా జాతి మొక్కలు మరో రకం. ఇవి జీర్ణక్రియను మెరుగుపరుస్తాయి. కడుపులో వికారం, గ్యాస్ లాంటి సమస్యలను తగ్గిస్తాయి. అలాగే ఇంట్లో పెంచుకోవాల్సిన మొక్కల్లో తులసి మరొకటి. దీన్ని వంటల్లో కూడా వాడుకోవచ్చు. ఇది కడుపు మంటను తగ్గిస్తుంది. ఈ మొక్కని వేడి నీటిలో నానబెట్టి చల్లార్చిన తర్వాత కొద్ది కొద్దిగా తీసుకుంటే కడుపులో మంట లాంటి సమస్యలు తగ్గుముఖం పడతాయి.
ఎటువంటి మెుక్కలను మనం ఇంటో పెంచుకోవచ్చు ?
మనస్సును ఆహ్లాదం… ఉత్తేజం కలిగించేందుకు పచ్చని మొక్కలు, పుష్పాలు అందించే సువాసనలు ఎంతో ప్రయోజనం కలిగిస్తాయి. ఈ మొక్కలకు ఇంట్లోని గాలిలో ఉన్న విషపూరితాలను 90 శాతం వరకు తొలగించే సామర్థ్యం ఉంటుంది. ఇంట్లో ఒక చిన్న మొక్కను పెంచుకుంటే అది ఆందోళన, ఒత్తిడి నుంచి ఉపశమనాన్ని కలిగిస్తుంది. ఏకాగ్రత, జ్ఞాపకశక్తి పెరగడంలో సాయపడుతుంది. మొక్కలు ఇంట్లో ఉంటే స్వచ్ఛమైన గాలి మనకు అందుతుంది. పచ్చదనం కళ్లకు హాయినిస్తాయి. చిన్న చిన్న కుండీల్లో పెంచుకునే మొక్కలు కంటికి హాయినిస్తాయి. చూపును మెరుగుపరుస్తాయి. పచ్చదనం మనసుకు ఉల్లాసాన్నిస్తుంది కూడా. దీంతో ఆరోగ్యంగా ఉండవచ్చంటున్నారు వైద్యులు.
ఇంటిని ఎంత అందంగా తీర్చిదిద్దుకున్నా కుండీల్లో చిన్న చిన్న మొక్కలు పెంచుకుని బాల్కనీలో అమర్చుకుంటే ఆ అందమే వేరు. బాల్కనీ లోంచి ప్రతిఫలించే కొద్దిపాటి ఆకుపచ్చదనమైనా మన మనసుకు ఎంతో ఆహ్లాదాన్ని ఇస్తుంది. అంతేకాదు మొక్కల పెంపకంతో మీరు రిలాక్స్‌ అవుతారు.
