హైదరాబాద్: తెలుగు మూవీ పైరసీ వెబ్ సైట్ ఐ-బొమ్మ నిర్వాహకుడు ఇమ్మడి రవి అరెస్ట్ అయ్యాడు. దమ్ముంటే పట్టుకోండంటూ పోలీసులకే సవాల్ విసిరిన రవిని కూకట్‌పల్లిలో సెంట్రల్ క్రైమ్ స్టేషన్ (CCS) పోలీసులు అదుపులోకి తీసుకున్నారు. నిన్న ఫ్రాన్స్ నుంచి హైదరాబాద్ వచ్చిన అతడిని సైబర్ క్రైమ్ పోలీసులు కూకట్‌పల్లిలో అదుపులోకి తీసుకున్నారు. రవి కరేబియన్ దీవుల్లో ఉంటూ ఐబొమ్మ (i-Bomma) వెబ్‌సైట్‌ను నిర్వహిస్తున్నట్లు పోలీసులు గుర్తించారు. అరెస్ట్ అనంతరం ఆయన అకౌంట్లో ఉన్న రూ.3 కోట్లు ఫ్రీజ్ చేసినట్లు తెలిపారు.
సినిమా విడుదలైన కొన్ని గంటల్లోనే HD ప్రింట్‌ పైరసీ చేసి ఐబొమ్మ సైట్లో విడుదల చేస్తున్న రవిపై తెలుగు సినీ నిర్మాతలు పోలీసులకు ఫిర్యాదు చేశారు. నిర్మాతల ఫిర్యాదు ఆధారంగా కేసు నమోదు చేసుకుని దర్యాప్తు చేపట్టారు పోలీసులు. ఈ క్రమంలో దమ్ముంటే పట్టుకోండి అంటూ పోలీసులకు సవాల్ విసిరాడు ఐ-బొమ్మ నిర్వాహకుడు. తన వెబ్‌సైట్‌పై కన్నేస్తే సినీ పరిశ్రమతో పాటు, పోలీసుల జీవితాలు బట్టబయలు చేస్తానంటూ బ్లాక్‌ మెయిల్ చేశాడు.
