Kiran – Tej Forever :మెగా కుటుంబంలో పెళ్లి సందడి మొదలైంది. టాలీవుడ్‌ యువ హీరో, సుప్రీమ్‌ స్టార్‌ సాయిదుర్గా తేజ్‌ త్వరలోనే ఓ ఇంటివాడు కాబోతున్నారు. కొంతకాలంగా ఆయన పెళ్లికి సంబంధించి సోషల్‌ మీడియాలో అనేక వార్తలు, ఊహాగానాలు ప్రచారంలో ఉండగా.. తాజాగా వాటికి తెరదించుతూ తేజ్‌ తన నిశ్చితార్థంతో అభిమానులకు సర్‌ప్రైజ్‌ ఇచ్చారు. కిరణ్‌ అనే యువతితో ఆయన ఏడడుగులు వేయడానికి సిద్ధమవుతున్నారు.
కుటుంబ సభ్యులు, అత్యంత సన్నిహితుల సమక్షంలో ఈ నిశ్చితార్థ వేడుక నిరాడంబరంగా జరిగినట్లు తెలుస్తోంది. ఈ వేడుకకు సంబంధించిన ఫొటోలను గ్లోబల్‌ స్టార్‌ రామ్‌చరణ్‌ సోషల్‌ మీడియాలో షేర్‌ చేయడంతో ఈ విషయం వెలుగులోకి వచ్చింది. సంప్రదాయ దుస్తుల్లో సాయిదుర్గా తేజ్‌, కిరణ్‌ జంటగా ఎంతో అందంగా కనిపించడంతో మెగా అభిమానులు ఆనందం వ్యక్తం చేస్తున్నారు. ప్రస్తుతం ఈ ఫొటోలు సోషల్‌ మీడియాలో వైరల్‌గా మారాయి.
ఈ సందర్భంగా రామ్‌చరణ్‌ కొత్త జంటకు ప్రత్యేకంగా శుభాకాంక్షలు తెలిపారు. “డియర్‌ తేజ్‌, కిరణ్‌.. మీ కొత్త జీవిత ప్రయాణానికి మనస్ఫూర్తిగా శుభాకాంక్షలు. మీ ఇద్దరి జీవితం ప్రేమ, ఆనందాలతో నిండి ఉండాలని కోరుకుంటున్నాను. మిమ్మల్ని ఇలా చూడటం ఎంతో సంతోషంగా ఉంది” అంటూ భావోద్వేగపూరితమైన సందేశాన్ని పంచుకున్నారు. అంతేకాకుండా #KiranTejForever అనే హ్యాష్‌ట్యాగ్‌ను జోడించారు.
ఈ నిశ్చితార్థ వేడుకలో మెగా పవర్‌స్టార్‌ రామ్‌చరణ్‌తో పాటు ఐకాన్‌ స్టార్‌ అల్లు అర్జున్‌ కూడా పాల్గొన్నారు. మెగా, అల్లు కుటుంబాలకు చెందిన పలువురు ప్రముఖులు ఒకే చోట చేరి కొత్త జంటను ఆశీర్వదించారు. దీంతో ఈ వేడుకకు సంబంధించిన ఫొటోలు అభిమానుల్లో మరింత ఆసక్తిని పెంచుతున్నాయి.
గతంలో జరిగిన బైక్‌ ప్రమాదం నుంచి కోలుకుని తిరిగి సినిమాల్లో బిజీ అయిన సాయిదుర్గా తేజ్‌.. ఇప్పుడు వ్యక్తిగత జీవితంలోనూ కొత్త ప్రయాణానికి శ్రీకారం చుట్టడం విశేషం. ఆయన నిశ్చితార్థ వార్త తెలియడంతో సినీ ప్రముఖులు, అభిమానులు సోషల్‌ మీడియా వేదికగా శుభాకాంక్షలు తెలియజేస్తున్నారు.
ఇక సాయిదుర్గా తేజ్‌, కిరణ్‌ వివాహం ఎప్పుడు జరగనుందనే విషయంపై అభిమానుల్లో ఆసక్తి నెలకొంది. అయితే పెళ్లి తేదీ, ఇతర వివరాలపై అధికారిక ప్రకటన రావాల్సి ఉంది.
