Aaryavir Sehwag : అండర్-19 ఆసియా కప్‌లో భారత యువ క్రికెటర్, మాజీ డాషింగ్ ఓపెనర్ వీరేంద్ర సెహ్వాగ్ కుమారుడు ఆర్యవీర్ సెహ్వాగ్ అదరగొట్టాడు. యూఏఈతో జరిగిన మ్యాచ్‌లో అద్భుతమైన బ్యాటింగ్‌తో 160 పరుగులు చేసి భారత జట్టు భారీ స్కోరు సాధించడంలో కీలక పాత్ర పోషించాడు. పాకిస్థాన్‌తో జరిగిన గత మ్యాచ్‌లో భారత్ ఓటమి ఎదుర్కొన్న నేపథ్యంలో, తిరిగి విజయాల బాట పట్టేందుకు ఈ మ్యాచ్ ఎంతో కీలకంగా మారింది. ఈ క్రమంలో ఆర్యవీర్ తన బాధ్యతాయుతమైన ఇన్నింగ్స్‌తో అందరి దృష్టిని ఆకర్షించాడు.
బ్యాటింగ్‌కు అంతగా అనుకూలించని పిచ్‌పై ఆర్యవీర్ ఎంతో సంయమనంతో ఇన్నింగ్స్‌ను ప్రారంభించాడు. ఆరంభంలో బంతి సీమ్ అవ్వడంతో పాటు స్పిన్‌కు అనుకూలంగా మారడం, నెమ్మదిగా రావడంతో పరుగులు సాధించడం సవాలుగా మారింది. అయినప్పటికీ ఎలాంటి తొందరపాటు లేకుండా క్రీజులో నిలదొక్కుకున్నాడు. తొలి గంటలో బౌలర్లను సమర్థంగా ఎదుర్కొంటూ 69 బంతుల్లో అర్ధశతకాన్ని పూర్తి చేశాడు.
ఆ తర్వాత పిచ్ బ్యాటింగ్‌కు అనుకూలంగా మారడంతో ఆర్యవీర్ తన అసలు ఆటను బయటపెట్టాడు. ముఖ్యంగా స్పిన్నర్లపై ఎదురుదాడికి దిగాడు. క్రీజు వెలుపలికి వచ్చి కవర్స్ మీదుగా భారీ సిక్సర్లు బాదడంతో పాటు, లాంగ్ ఆన్‌, లెగ్ సైడ్ దిశగా ఆకట్టుకునే షాట్లు ఆడాడు. దీంతో భారత స్కోరు వేగంగా పెరిగింది.
ఈ క్రమంలో 131 బంతుల్లో సెంచరీ సాధించిన ఆర్యవీర్.. అక్కడితో ఆగకుండా మరింత దూకుడుగా బ్యాటింగ్ చేశాడు. యూఏఈ స్పిన్నర్ ఉద్దిష్ సూరి వేసిన ఒకే ఓవర్‌లో 21 పరుగులు రాబట్టి తన ఆధిపత్యాన్ని చాటుకున్నాడు. అనంతరం 160 బంతుల్లో 150 పరుగుల మైలురాయిని చేరుకున్నాడు. చివరికి 45వ ఓవర్‌లో 160 పరుగుల వ్యక్తిగత స్కోరు వద్ద ఔటయ్యాడు. అతని అద్భుత ఇన్నింగ్స్‌లో 17 ఫోర్లు, 7 సిక్సర్లు ఉన్నాయి. ఈ టోర్నీలో ఇప్పటివరకు నమోదైన అత్యధిక వ్యక్తిగత స్కోరుగా ఇది నిలిచింది. మరోవైపు వికె.వి. వినీత్ కూడా అర్ధశతకంతో రాణించి ఆర్యవీర్‌కు చక్కటి సహకారం అందించాడు.
ఇక తండ్రి వీరేంద్ర సెహ్వాగ్ దూకుడైన బ్యాటింగ్ శైలికి భిన్నంగా ఆర్యవీర్ సంప్రదాయ ఓపెనర్ తరహాలో తన ఇన్నింగ్స్‌ను నిర్మించడం విశేషం. ఆరంభంలో వికెట్ కాపాడుకుంటూ, పరిస్థితులకు అనుగుణంగా ఆడిన అతను.. ఆ తర్వాత ప్రత్యర్థి బౌలర్లపై విరుచుకుపడ్డాడు. తండ్రిలా ధాటిగా ఆడటమే కాకుండా, అవసరమైన సమయంలో సంయమనం పాటించగలనని నిరూపించాడు. మొత్తానికి 160 పరుగుల అద్భుత ఇన్నింగ్స్‌తో భారత క్రికెట్‌లో తనకంటూ ప్రత్యేక గుర్తింపు సంపాదించుకునే దిశగా మరో అడుగు వేశాడు.
