బాలీవుడ్‌లో తనకంటూ ప్రత్యేక గుర్తింపు సంపాదించుకున్న నటి జాన్వీ కపూర్ తాజాగా చేసిన వ్యాఖ్యలు సినీ వర్గాల్లో చర్చనీయాంశంగా మారాయి. అతిలోక సుందరి శ్రీదేవి కుమార్తెగా సినీ పరిశ్రమలోకి అడుగుపెట్టిన జాన్వీ.. హీరోయిన్ కావాలన్న తన నిర్ణయాన్ని తల్లి శ్రీదేవి మొదట్లో తీవ్రంగా వ్యతిరేకించారని వెల్లడించింది. అంతేకాకుండా, తన ముక్కుకు శస్త్రచికిత్స (రైనోప్లాస్టీ) జరిగిన తర్వాతే తనలో హీరోయిన్ అయ్యే సామర్థ్యం ఉందని తల్లి నమ్మినట్లు ఆసక్తికర విషయాన్ని బయటపెట్టింది.
ఇటీవల ‘గలాట్టా ప్లస్’ తమిళ ఛానెల్‌కు ఇచ్చిన ఇంటర్వ్యూలో జాన్వీ కపూర్ తన సినీ ప్రయాణానికి సంబంధించిన పలు విషయాలను పంచుకుంది. ఈ ఇంటర్వ్యూకు ఆమె కజిన్, నటి మహేశ్వరి వ్యాఖ్యాతగా వ్యవహరించారు. ఈ సందర్భంగా జాన్వీ మాట్లాడుతూ.. తాను సినిమాల్లో హీరోయిన్‌గా నటించాలనుకుంటున్నట్లు మొదట చెప్పినప్పుడు శ్రీదేవి తీవ్రంగా వ్యతిరేకించారని గుర్తుచేసుకుంది.
సినిమా రంగంలోకి వస్తే వ్యక్తిగత జీవితాన్ని పూర్తిగా త్యాగం చేయాల్సి వస్తుందని, ఈ పరిశ్రమలో కొనసాగాలంటే ఎంతో కష్టపడాలని తన తల్లి హెచ్చరించినట్లు తెలిపింది. ఇదే విషయాన్ని ప్రస్తావించిన మహేశ్వరి.. జాన్వీ సినిమాల్లోకి రావాలనుకుంటోందని, అయితే ఆమెపై తనకు మొదట్లో అంతగా నమ్మకం లేదని శ్రీదేవి తనతో కూడా చెప్పినట్లు వెల్లడించారు. సినీ రంగంలో రాణించాలంటే అంకితభావం, కఠిన శ్రమతో పాటు మానసికంగా ఎంతో దృఢంగా ఉండాలని శ్రీదేవి అభిప్రాయపడినట్లు గుర్తుచేశారు.
ఈ క్రమంలో జాన్వీ తన ముక్కు సర్జరీ గురించి సంచలన విషయాన్ని వెల్లడించింది. ‘‘బహుశా ఈ ఇంటర్వ్యూలో ఈ భాగాన్ని తొలగిస్తారేమో.. కానీ నిజం చెప్పాలంటే, నా ముక్కుకు సర్జరీ జరగకముందు వరకు నేను హీరోయిన్‌గా రాణించగలనని మా అమ్మ నమ్మలేదు. సర్జరీ జరిగిన తర్వాతే నా రూపం, నాలోని నటనా సామర్థ్యంపై ఆమెకు నమ్మకం కలిగింది. ఆ తర్వాతే సినిమాల్లోకి రావడానికి అంగీకరించారు’’ అని జాన్వీ పేర్కొంది. ఆమె చేసిన ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి.
కాగా, జాన్వీని వెండితెరపై కథానాయికగా చూడాలన్న శ్రీదేవి కోరిక నెరవేరకుండానే ఆమె కన్నుమూశారు. జాన్వీ తొలి చిత్రం ‘ధడక్’ విడుదలకు ముందే 2018 ఫిబ్రవరిలో దుబాయ్‌లో జరిగిన ఓ వివాహ వేడుకకు వెళ్లిన శ్రీదేవి.. అక్కడి హోటల్‌లోని బాత్‌టబ్‌లో ప్రమాదవశాత్తు మునిగి 54 ఏళ్ల వయసులో మరణించారు. తల్లి మరణం తర్వాత జాన్వీ ‘ధడక్’ సినిమాతో బాలీవుడ్‌లో కథానాయికగా పరిచయమైంది.
